यशवंतराव चव्हाण सेंटरच्या वतीने दिला जाणारा 'यशवंतराव चव्हाण राज्यस्तरीय पारितोषिक २०२५' ज्येष्ठ नेते शरद पवार यांच्या हस्ते 'युसूफ मेहेरअली सेंटर, तारा' या संस्थेला प्रदान करण्यात आला; दोन लाख रुपये रोख आणि मानपत्र असे या पुरस्काराचे स्वरूप आहे. याप्रसंगी बोलताना शरद पवार यांनी संकटाच्या काळात धावून जाणाऱ्या युसूफ मेहेरअली सेंटरच्या कार्याचा, तसेच दिवंगत जी. जी. पारीख यांच्या निस्वार्थ योगदानाचा आणि डाव्या चळवळीच्या नेत्यांच्या सहभागाचा गौरव केला. याच कार्यक्रमात सुप्रिया सुळे यांनी सेंटरच्या भावी वाटचालीविषयी बोलताना शिक्षण क्षेत्रातील वाढता एआयचा प्रभाव, महिला सबलीकरण, तसेच तंत्रज्ञानाच्या युगात वाढणाऱ्या अंधश्रद्धा आणि हुंडाबळीविरोधात काम करण्याच्या गरजेवर भर दिला. डॉ. अनिल काकोडकर यांच्यासह अनेक मान्यवरांच्या उपस्थितीत पार पडलेल्या या कार्यक्रमात, सेंटरचा राष्ट्रीय पुरस्कार प्रोफेसर अनिल गुप्ता यांना १२ मार्च २०२६ रोजी प्रदान करण्यात येणार असल्याची घोषणाही करण्यात आली.
