लातूर येथील पंचवीस वर्षांपासून हा संघ ज्येष्ठांसाठी अथकपणे कार्यरत आहे. पूर्वी या ज्येष्ठ नागरिक संघाचे १२५ ते १५० सभासदांची संख्या होती परंतु, आज साडेतीनशेपेक्षा अधिक सदस्यांपर्यंत विस्तारली आहे.

निष्ठावान व रसिक सदस्यांसाठी कवी संमेलन, कथाकथन, संगीत आणि नाटक स्पर्धा आयोजित करून त्यांनी ज्येष्ठांच्या कलागुणांना वाव दिला आहे. ७५ वर्ष पूर्ण झालेल्या ज्येष्ठांसाठी अमृत महोत्सव, तर ८१ वर्षांसाठी सहस्रचंद्र दर्शन आणि जीवनगौरव पुरस्कार – हे कार्यक्रम गेल्या पाच वर्षांपासून सातत्याने राबवले जात आहेत.

महाराष्ट्रातील ज्येष्ठ नागरिकांसाठी ३४ वे राज्यस्तरीय अधिवेशन घेऊन, साडेतीन हजार ज्येष्ठांना एकत्र आणले. महाराष्ट्र राज्य साहित्य संस्कृती मंडळाकडून मिळालेल्या दोन लाख अनुदानातून ज्येष्ठांसाठी पहिले साहित्य संमेलन यशस्वी केले. गेल्या चार वर्षांत कार्यक्रमांद्वारे ९ लाख रुपये एफडी स्वरूपात जमा करून संघाची आर्थिक बळकटी वाढवली आहे.

या संघामार्फत नेत्रदान, देहदान याविषयी जनजागृतीपर व्याख्याने आयोजित केली जातात. भविष्यात ज्येष्ठांसाठी डे केअर सेंटर सुरू करण्याचा त्यांचा संकल्प आहे.

ज्येष्ठ नागरिक संघ, लातूर यांना यशवंतराव चव्हाण सेंटरचा ‘यशवंतराव चव्हाण ज्येष्ठ नागरिक संघ राज्यस्तरीय कृतज्ञता सन्मान’ देताना आम्हाला अतिशय आनंद होत आहे.